По расправија за време на свадбена прослава во 2024 година, Џејмс Шира се качил во џип и го прегазил Тери Тејлор помладиот, пишува „Гардијан“.
Џејмс Шира, 24, од Флинт, беше осуден вчера во окружниот суд во Џенеси. Тој го убил својот најдобар пријател, 29-годишниот Тери Тејлор помладиот, на 30 август 2024 година, кога го удрил со џип. Тејлор бил префрлен во локалната болница со сериозни повреди, каде што подоцна починал. „Никогаш не сум видел нешто слично. Имало случаи на луѓе кои прегазиле други луѓе, но не веднаш по свадбата“, изјавил окружниот обвинител за „CBS News“ во тоа време.
Џејмс Шира, кој не се спротивставил на обвиненијата во април, бил осуден за убиство од втор степен, возење со суспендирана возачка дозвола што резултирало со смрт и непружање помош на местото на несреќата што резултирала со смрт.
„Засекогаш ќе се каам“
При изрекувањето на пресудата, Шира се обрати емотивно до судот. „Единственото нешто што можам да го направам до крајот на животот е да изразам извинување и каење. Засекогаш ќе се каам“, рече тој. Тој тврдеше дека убиството на Тејлор „не било намерно“ и дека ја прифаќа „целосната одговорност“ за своите постапки. „Господине Шира, не ве сметам за криминалец. Сепак, вие сте убиец“, му одговори судијата Хари Ханибл.
Убиството се случило во Флинт неколку часа откако Шира и неговата сопруга, Савана Колиер, се венчале. Свадбата се одржала во локална пицерија, а потоа продолжила во една куќа. Полицијата објави дека на убиството му претходела расправија меѓу младенците и кумот.
„По свадбата, Тејлор бил вмешан во расправија, по што бил удрен од теренец кој се движел со голема брзина“, соопшти полицијата, без да ја открие причината за расправијата. Според сведоците, младоженецот пиел цел ден. За време на расправијата со Тејлор, тој се оддалечил за кратко време, само за да се врати со возило околу една минута подоцна и да го удри. Тејлор бил фрлен во воздух од силата на ударот, објави MLive.
Ќе биде судена и сопругата на убиецот
Тејлор стоел пред куќата каде што се одржувала забавата кога Шира го прегазил. Младенците потоа избегале од местото на настанот и не контактирале со полицијата сè до следниот ден, изјави тогаш окружниот обвинител Дејвид Лејтон. Таа одлука, додаде тој, „им го отежнала на истражителите да расветлат што се случило“.
Членови на семејството и на Шира и на Тејлор биле присутни на изрекувањето на пресудата. Ерен Тејлор, роднина на убиениот човек, се присети на настанот. „Кога стигнав до него, сè што видов беше крв“, рече таа. Потоа директно ѝ се обрати на Шира. „Се надевам дека ќе ја добиеш најстрогата казна“, му рекла таа.
Тери Тејлор помладиот, тој зад себе остави четири деца и свршеница. Изрекувањето на пресудата за сопругата на Шира, Савана Колиер (23), е закажано за 26 мај. Во април, таа исто така одлучи да не ги оспорува обвиненијата дека му помагала на својот сопруг откако било извршено кривичното дело.
