Илјадници граѓани излегоа на улиците на Буенос Аирес, барајќи правда за 15-годишната Лара Гутиерез и 20-годишните Морена Верди и Бренда дел Кастиљо, кои беа силувани, мачени и убиени, како што објави Телеграф.
Она што го прави овој настан уште пострашен е фактот дека бруталното убиство беше емитувано во живо на социјалната мрежа ТикТок.
Застрашувачка порака од нарко-банда
Полицијата верува дека нарко-банда стои зад гнасниот чин, а убиството беше емитувано како застрашувачко предупредување до другите. Истражителите велат дека жртвите биле намамени во комбе на 19 септември, под изговор дека одат на забава. Властите се сомневаат дека тоа било дел од план да се „казнат“ девојките за кршење на кодексот на однесување на бандата.
Истраги и апсења се во тек
Министерката за национална безбедност Патриша Булрих потврди дека петмина осомничени - тројца мажи и две жени - се уапсени . Сепак, 20-годишниот Перуанец за кој се верува дека е водач на групата сè уште е на слобода. Неговата фотографија е објавена за да помогне во неговото идентификување и лоцирање.
Министерот за безбедност на покраината Буенос Аирес, Хавиер Алонсо, изјави дека еден од притворените открил снимка од инцидентот за време на измачувањето. Може да се слушне како водачот на бандата вели: „Еве што им се случува на оние што ми ја крадат дрогата“. Телата на трите девојки беа пронајдени пет дена по нивното исчезнување, закопани во имот во јужните предградија на Буенос Аирес.
Семејствата бараат правда
Членовите на семејствата на жртвите се придружија на протестниот марш до зградата на парламентот, гласно барајќи правда. „Жените мора да бидат заштитени повеќе од кога било“, изјави таткото на Бренда, Леонел дел Кастиљо, за новинарите. Тој претходно изјави дека не можел да го препознае телото на својата ќерка поради сериозноста на повредите. Дедото на 20-годишната внука, Антонио дел Кастиљо, со солзи ги нарече убијците „крвожедни“.
„Она што им го направија, не би им го направиле на животно“, рече тој.
Според организацијата за следење на фемицидот во Аргентина, во оваа земја на секои 36 часа маж убива жена.
