Јапонската премиерка Санае Такаичи вети дека ќе води „одговорна“ буџетска политика по парламентарните избори кои, според првичните прогнози на јапонските медиуми, ќе ѝ овозможат на нејзината партија да го врати апсолутното мнозинство во Долниот дом на парламентот.
„Постојано ја нагласуваме важноста на одговорната и проактивна буџетска политика“, рече Такаичи, додавајќи дека сака да „изгради силна и одржлива економија“.
Се очекува владејачката коалиција во Јапонија да освои две третини од местата во Долниот дом на парламентот, објави јапонската јавна телевизија.
Највлијателното бизнис лоби во Јапонија ја поздрави изборната победа на владејачката Либерално-демократска партија, со што таа доби мнозинство во Долниот дом на парламентот по општите избори во вторник, објави Асошиејтед Прес.
Јошинобу Цуцуи, претседател на Јапонската бизнис федерација, ја повика владата на премиерката Санае Такаичи да „покаже силно лидерство засновано на длабоката доверба на народот за брзо и одржливо спроведување на важни политички мерки“.
Како што објавија јапонските медиуми, се очекува најголемата опозициска партија во Јапонија, Централниот реформски сојуз, да изгуби значителен број од своите членови во Претставничкиот дом на денешните избори. Ова значи дека политичката иднина на двајцата копретседатели на партијата станува доста неизвесна, покажуваат излезните анкети.
Алијансата беше формирана во јануари по спојувањето на двете опозициски партии, Уставната демократска партија (КДП) и Комеито (Партијата за чиста политика). Формирањето на единствената партија се случи откако Комеито го заврши својот 26-годишен сојуз со владејачката Либерално-демократска партија во октомври.
