Шефот на партијата „Борци за економска слобода“ (ЕФФ) веднаш ќе почне со издржување на казната, изјави денеска судијката Тванет Оливие во Судот за прекршоци во градот КуГомпо, поранешен Источен Лондон.
Адвокатот на Малема најави дека ќе поднесе жалба.
Во 2018 година, Малема истрела неколку куршуми во воздух за време на партиска прослава. Тој немал дозвола за полуавтоматската пушка. Партискиот лидер, во кого беа положени големи надежи како млад политичар, беше прогласен за виновен во октомври, а изрекувањето на казната оттогаш беше во исчекување.
Како што пренесе ДПА, судијката рече дека судот заклучил дека Малема не пукал од импулсивност или гнев, туку на планиран начин. Со тоа, тој намерно ги довел присутните во опасност. Одбраната ги опиша истрелите како „почесни плотуни“.
Малема му се приклучи на владејачкиот Африкански национален конгрес (АНЦ) на деветгодишна возраст, во време кога партијата беше во последната фаза од својата борба против расистичкиот режим на апартхејдот. Откако Нелсон Мандела стапи на функцијата во 1994 година како прв црн претседател на Јужна Африка, Малема брзо напредуваше во партиските редови. Меѓутоа, во 2012 година беше исклучен од АНЦ. Една година подоцна, Малема ја основаше ЕФФ, која се позиционира како радикално, левичарско и антикапиталистичко движење.
Веќе неколку години Малема се соочува со бројни обвинувања кои се движат од перење пари, измама и корупција до проневера на партиски средства и говор на омраза. Тој исто така беше цел на критики поради неговиот раскошен начин на живот, кој е во остар контраст со неговата политичка реторика.
