И покрај обидите на Ирак да остане надвор од војната во Иран, кабинетот на ирачкиот премиер на X објави дека „осудените напади насочени кон нашите воени единици продолжија, од кои последниот се случи утрово со предавничка агресија врз воената клиника Ал-Хабанија, која е под надлежност на Министерството за одбрана“.
Според „Ал џезира“, нападот бил насочен кон позициите на Силите за народна мобилизација (ПМФ), кои се дел од редовните вооружени сили на Ирак, но вклучуваат бригади кои им припаѓаат на групи поддржани од Иран. ПМФ ги обвинува САД за нападот, во кој загина еден од нивните команданти и уште 14 други борци на ПМФ.
„Потврдуваме дека владата и вооружените сили го поседуваат правото да одговорат со сите достапни средства во согласност со Повелбата на Обединетите нации“, соопшти Ирак, додавајќи дека „тие нема да молчат пред светоста на крвта на нашите херојски маченици“ и дека нападот „му штети на односот што ги поврзува народите на Ирак и Соединетите Американски Држави“.
Ирачкиот премиер Мохамед Шиа Ал-Судани изјави дека неговото министерство за надворешни работи ќе му врачи на американскиот вршител на должност „официјална протестна нота со остар тон, која ја вклучува нашата цврста и непоколеблива позиција за зачувување на ирачкиот суверенитет и ги осудува неодговорните постапки што доведоа до ова гнасно злосторство“.
Ирак, исто така, ќе поднесе жалба до Советот за безбедност на ОН.
