Овој необичен, но сè попопуларен тренд не само што им помага на семејствата полесно да ги пронајдат гробовите на своите најблиски, туку и го зачувува нивното сеќавање, објавува „Јамајка Обзервер“.
Едноставен процес на производство
Во последниве години, „Егзодус погребална служба“ инсталира картонски 2Д портрети.
„Ова е различно од портрет на надгробен споменик. Можете да поминете покрај гробишта и да препознаете близок“, рече претставник на компанијата.
Тој додава дека картонските фигури им олеснуваат на семејствата да го најдат местото на погреб во преполниот и честопати хаотичен распоред, а можат да се видат и на гробиштата во Портланд, Света Катерина и Хајгејт на Јамајка.
Процесот на креирање е едноставен. Семејствата избираат фотографија од починатиот, која потоа се трансформира во 2Д картонска фигура и се зајакнува со челична конструкција за да издржи различни временски услови.
„Споменот е сè уште жив“
„Вие избирате дали ќе ја направиме целата фигура или половина од неа“, велат од Погребалната служба „Егзодус“.
Шелдон, жител на оваа област, гледајќи во картонска фигура на својата почината мајка, вели дека оваа практика му дала утеха.
„Како да е сè уште тука, на некој начин. Како сеќавањето на неа сè уште да живее“, рече тој со насмевка.
Друг локален жител, Мегил Јанг, ја поставил фигурата на гробот на мајката на своите деца, која починала пред два месеци.
„Тоа беше мојата партнерка. Штом ја видов, се чувствувам тажно затоа што таму е погребана некоја драга личност, но барем сè уште можеме да го видиме нејзиното лице“, рече тој.
